Die
grondslag van gemeentes wat lede van die Afrikaanse
Baptiste Kerke is, word gevorm deur ’n gemeenskaplike
belydenis van geloof in die Here Jesus Christus, asook die
handhawing, onderrig en beoefening van die volgende
basiese beginsels:
1.
Die Afrikaanse Baptiste Kerke gee erkenning aan historiese
Baptistegeloofsbelydenisse, soos onder andere die 1689
Baptistegeloofs-belydenis en "So glo ons",
terwyl ons saam met ander Protestante groepe, onder
andere, die volgende vier belydenisuitsprake onderskryf:
1.1
Ons glo in die absolute gesag van die Ou en Nuwe Testament
wat deur Goddelik-geïnspireerde manne, onder die direkte
lig en leiding van die Heilige Gees geskrywe is. Ons
aanvaar die Bybel as algehele en finale gesag vir geloof
en lewe.
1.2
Ons glo in een God, die enigste en waaragtige lewende God-
die Vader, Seun en Heilige Gees, een wese - drie persone.
1.3
Ons glo in die Here Jesus Christus as die enigste
opgestane Verlosser en Middelaar tussen God en mens -
waarlik God en waarlik mens en ons erken Hom as Hoof van
die liggaam wat die Kerk is. (Kol 1:18).
1.4
Ons glo in die Heilige Gees, die onvervreembare gawe van
God die Vader en die Here Jesus Christus aan sy gemeente.
Dit is sy taak om die Here Jesus Christus te verheerlik,
die gemeente te bou en toe te rus en die wêreld van
sonde, geregtigheid en oordeel te oortuig.
2
Beginsels wat ons onderskei as tipiese Baptiste Kerke:
2.1
Ons glo dat die plaaslike gemeente waarlik en volwaardig
Kerk van Christus is. Dit is volkome selfstandig en bly
dit selfs as dit vrywillig met ander gemeentes in
vereniging tree.
2.2
Ons glo dat die gemeente bestuur moet word onder die
leiding van die Here Jesus Christus as Hoof. ’n
Behoorlik gekonstitueerde vergadering van lidmate vorm die
hoogste gesag in die gemeente. Elke lidmaat het die
onvervreembare reg en verantwoordelikheid om deel te neem
in die bestuur en beheer van die gemeente wat die
aanstelling en beheer oor leiers insluit.
2.3
Ons glo dat die doop van gelowiges ’n opdrag van die
Here Jesus Christus is en dat die doop ten nouste verbonde
is aan die hart van die Evangelie, naamlik die dood,
begrafnis en opstanding van die Here Jesus Christus.
2.4
Ons glo dat die Heilige Nagmaal as opdrag aan die Kerk van
Jesus Christus 'n voortdurende herinnering aan sy dood,
totdat Hy weer kom is, waardeur die Heilige Gees die ware
gelowige voed en versterk, en dien as waarborg van hulle
gemeenskap met die opgestane Here en mety mekaar as lede
van sy liggaam. Die onveranderlikke elemente van brood en
wyn verteenwoordig soos God bepaal die vlees en bloed van
die Here Jesus Christus, ons Verlosser, wat vir die
vergifnis van die mens se sonde geoffer is.
2.5
Ons glo dat getuienis van wedergeboorte en doop deur
onderdompeling, voorvereistes vir kerklidmaatskap is.
2.6
Ons glo in die priesterskap van alle gelowiges waardeur
ons verklaar dat elke Christen direkte toegang tot God
deur die Here Jesus Christus het en deel het in sy werk
van versoening. Hierdie deelname sluit voorbidding,
aanbidding, getroue diens en getuienis van sy reddende
genade, in.
2.7
Ons glo in godsdiensvryheid, sodat elke individu vry is
van enige inmenging deur die staat,organisasie of groep
met betrekking tot geloof. Hierdeur word die individu se
reg om die Bybel in die lig van sy gewete te interpreteer,
gewaarborg.
2.8
Ons glo in die afsondering tussen die kerk en die staat
deurdat, in die voorsiening van God die twee in hulle
respektiewelike aard en funksies verskil. Die kerk kan nie
met die staat geïdentifiseer word nie en dit kan ook nie
in sake van geloof en praktyk deur die staat beheer en
gekontroleer word nie. Die staat is verantwoordelik vir
die administrasie van die Reg, om orde in die gemeenskap
te verseker en om die welvaart van die landsburgers te
bevorder. Die Kerk is verantwoordelik om die Woord van God
aan alle mense te verkondig.
